Habari za Wizara

Nusura shilingi bilioni 1.2 ziondoke na Mkurugenzi Malinyi

 Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo akiongea na baadhi ya mafundi wa wanaojenga Hospitali ya Wilaya ya Malinyi, wakati alipokuwa kwenye ziara yake ya kikazi ya kukagua miradi mbalimbali ya maendeleo katika Halmashauri ya Wilaya ya Malinyi Mkoani Morogoro.

Na. Angela Msimbira   – Malinyi, Morogoro

Waziri wa Nchi Ofisi ya Rais Tawala za Mikoa na Serikali za Mitaa Mhe.Selemani Jafo ameiagiza timu ya wataalam wa ufuatiliaji wa fedha za miradi kutoka OR-TAMISEMI kufanya uchunguzi wa matumizi ya shilingi bilioni 1.2 zilizotumika kwa ajili ya ununuzi wa vifaa vya ujenzi wa Hospitali ya Wilaya ya Malinyi Mkoani Morogoro.

Ametoa maagizo hayo leo wakati akiongea na wananchi wa Halmashauri hiyo kwenye ziara yake ya kikazi ya kukagua maendeleo ya miradi mbalimbali inayotekelezwa katika Halmashauri ya Wilaya ya Malinyi, Mkoani Morogoro.

Amesema kuwa wataalam hao watakwenda kufanya uchunguzi wa kina na ufuatiliaji wa ununuzi wa vifaa  vya ujenzi uliofanyika katika Ujenzi wa Hospitali hiyo lengo likiwa ni kuhakikisha  matumizi ya fedha zilizotolewa na Serikali yanaendana na majengo yaliyojengwa.

Amesema kuwa endapo itabainika kwamba kuna makosa yalifanyika hatua zitachukuliwa lakini baada ya kujirizisha kwa kuwa taarifa ya awali inaonyesha fedha hizo zimeliwa na Ofisi ya Halmashauri ya Wilaya ya Malinyi.

“Taarifa ya awali inaonyesha kuwa shilingi bilioni 1.2 zilizotumika kwa ajili ya ununuzi wa vifaa vya Ujenzi wa Hospitali ya Wilaya ya Malinyi hazikufuata taratibu, ndio maana OR-TAMISEMI inakuja kujiridhisha zaidi kabla ya kuchukua hatua” Anasisitiza Mhe. Jafo.

Wakati huohuo Mhe. Jafo amesema kuwa hajaridhishwa na kasi ya ujenzi wa Hospitali hiyo na ametoa mwezi mmoja kwa Halmashauri hiyo kuhakikisha wanamaliza ujenzi kwa asilimia 100.

“Mkuu wa Wilaya na Mkurugenzi wa Halmashauri ya Wilaya ya Malinyi sijarizishwa na kasi ya ujenzi wa hospitali hii hakikisheni mnafanyakazi usiku na mchana ili ifikapo tarehe 30/9/2019 ujenzi uwe ukamilika” Anasisitiza Mhe Jafo

Ameendelea kufafanua kuwa pamoja na maelezo aliyopatiwa na Mkuu wa Wilaya ya Malinyi na Mkurugenzi wa Halmashauri hiyo bado wameshindwa kukamilisha ujenzi wa Hospitali hiyo kwa wakati jambo ambalo linarudisha nyuma maendeleo katika Halmashauri hiyo

Amesema kuwa utaratibu wa Ofisi ya Rais Tawala za Mikoa na Serikali za Mitaa kwa sasa ni kuwatoa viongozi na watumishi wote ambao wanashindwa kusimamia miradi ya maendeleo katika maeneo yao na kukwamisha juhudi za Serikali za kuleta maendeleo kwa jamii.

Mhe Jafo ameendelea kusema kuwa Halmashauri ya Wilaya ya Malinyi ni eneo ambalo limejaa makundi jambo ambalo linarudisha nyuma maendeleo na kukwamisha utekelezaji wa miradi ya maendeleo katika Halmashauri hiyo hivyo amewataka viongozi kushirikiana na kuleta mabadiliko.

Amesema kuwa inasikitisha kuona kwamba katika utekelezaji wa ujenzi wa miundombinu ya afya Mkoa wa Morogoro bado ni tatizo ikiwemo Halmashauri ya Wilaya ya Malinyi jambo ambalo halileti picha nzuri kwa jamii.

Mhe.Jafo ameuagiza Uongozi wa Halmashauri hiyo kufanyakazi kama timu na kuacha tofauti zao ili kuleta maendeleo katika Halmashauri hiyo.

Aidha, Mkurugenzi wa Halmashauri ya Wilaya ya Malinyi Bw. Mussa Mnyeti amemuhakikishiwa Mhe. Jafo kuwa shilingi bilioni 1.2 zimetumika kwenye manununuzi ya vifaa vya ujenzi wa Hospitali ya Wilaya ya Malinyi na kumuhakikishia kuwa vifaa hivyo tayari vimeshanunuliwa kwa ajili ya kukamilisha ujenzi huo.

 Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo akiongea na baadhi ya viongozi wa Hospitali ya Wilaya ya Malinyi, wakati alipokuwa kwenye ziara yake ya kikazi ya kukagua miradi mbalimbali ya maendeleo katika Halmashauri ya Wilaya ya Malinyi Mkoani Morogoro.
Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo akiongea akikagua ujenzi wa Hospitali ya Wilaya ya Malinyi, wakati alipokuwa kwenye ziara yake ya kikazi ya kukagua miradi mbalimbali ya maendeleo katika Halmashauri ya Wilaya ya Malinyi Mkoani Morogoro.

Leave a Reply

Your email address will not be published. Required fields are marked *