Habari Kitaifa

TAMISEMI Yatangaza Vituo vya Kazi Ajira Mpya za Walimu na Mafundi Sanifu 2,160

Na. Fred Kibano

Waziri wa Nchi Ofisi ya Rais TAMISEMI Mhe. Selemani S. Jafo akitangaza kupangiwa vituo kwa walimu na Mafundi Sanifu wapya katika halmashauri nchini Jijini Dodoma leo. Kulia kwake ni Naibu Waziri Ofisi ya Rais TAMISEMI Joseph G. Kakunda

Waziri wa Nchi Ofisi ya Rais Tawala za Mikoa na Serikali za Mitaa (OR – TAMISEMI) Mhe. Selemani Jafo, ametangaza kuwapangia vituo vya kazi walimu wapya wa sekondari na mafundi sanifu wa maabara 2,160 mjini Dodoma.

Akitangaza vituo vya kazi kwa walimu hao wapya 2,160, Waziri Jafo amesema walimu hao ni sehemu ya ajira za walimu 6,785 ambao Ofisi ya Rais – TAMISEMI ilipata kibali cha kuwaajiri kutoka Ofisi ya Rais Utumishi wa Umma na Utawala Bora mwezi Mei mwaka huu, ambapo walimu 4,840 walipangiwa vituo vya kazi mapema mwezi Julai mwaka huu.

“leo tunawatangazia ajira za watumishi 2,160 waliopangwa katika shule za sekondari 1,721. Kati yao, walimu 1,900 ni wa masomo ya Sayansi na Hisabati, walimu 100 ni wa Kiingereza na Fundi Sanifu Maabara 160”

Amesema watumishi hawa waliopangiwa vituo vya kazi, wanatakiwa kuripoti katika Ofisi za Wakurugenzi wa halmashauri husika na baadaye kwenye shule kuanzia tarehe 23 Agosti, 2018 hadi Septemba, 5 2018 huku wakiwa na vyeti halisi vya kitaaluma, vyeti halisi vya kitaalam na cheti cha kuzaliwa.

Waziri Jafo amewaelekeza Wakurugezi wa halmashauri ambazo zimepangiwa watumishi hao kuwapokea kwa kuzingatia kanuni na taratibu za utumishi wa Umma.

Amewataka watumishi hao wapya kutochukua posho ya kujikimu bila kuripoti katika kituo cha kazi kwani watachukuliwa hatua za kisheria, wala hakutakuwa na kubadilisha kituo cha kazi kwa sababu yoyote ile badala yake muda uliotolewa kuripoti ukipita, nafasi hiyo itachukuliwa na mtu mwingine mwenye sifa stahiki ambaye hakuchaguliwa.

Majina ya watumishi walimu waliopangiwa vituo vya kazi inapatikana katika tovutio ya Ofisi ya Rais – TAMISEMI ya www.tamisemi.go.tz

Leave a Reply

Your email address will not be published. Required fields are marked *